اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

mardi 25 août 2009

مع الاسف تمر جانبية اه لحسن الحظ والحمد لله مرت جانبية


اللي يقول اللي الشعب هذاية تاعب و ماعادش عندو ما يقول و ما يعبّر راهو غالط. و اللي يقول زادة اللي الشعب هذاية مستسلم لمصيرو و مسلـّم نفسوا للاحكام و قاضي الاحكام و صاحب أغنية يا قاضي الأحكام ( الأخ سمير الوصيف يذكرو بالخير) راهو غالط...

شعب العشرة مليون اللي جاب فرحات حشّـاد و جاب الحبيب بورقيبة و قبلهم جاب علي بن غذاهم شيخ العربان و زميمهم ... الشعب العريق هذاية صبر ياسر و ماعادش ينجم يزيد يصبر...و برغم وداعتو و طيبتو و صبرو على ثقيلي الظل (من السيّاح و من اهل البلد) و تفانيه في خدمتهم و توفير اسباب الراحة و الرفاهية ليهم ... فكان من الطبيعي انو يوصل لنهار كيف ما هذا ... نهار يعلن فيه العصيان في وجه ثقيلي الظلّ و يصيح : "يزّززززيي فككككككككّ ..."

الشّعب الكريم فدّ و تطيقر مبعد سنوات العوج و اللغة المضروبة ... و فوق العوج و اللغة المضروبة تحمّل المصاريف و خلّص الفاتورات (القانونية و الغير قانونية ) ، و كان (دائما و ابدا) هو الدغفة ، السّـاذج ، النيّة ، البوهالي ، الدرويش اللي يتدروش عليه الجميع و ماعندوش الحق يسيّب الدروشة (حتى على روحو)...

ناقف لهنا و نعمل توضيح هام على خاطر سي عمار الـ404 الحقيقي (موش العمامير البوذرّوح المعششة في البلوقوبطاطا متاع حسين) جبد المقصّ متاعو و بدأ يقلّب في مدونة غدوة نحرق باش يلقى البلاصة المناسبة للتمقيص..
كلامي هذا يخصّ مجموعة على الفايسبوك ، مجموعة تكوّنت خصّيصا لسي توفيق العبيدي رئيس قسم الرياضة في التلفزة التونسية ، تطالب فيه سي توفيق بـ "تعليق الصّباط"...
و اشكون ما يعرفش توفيق العبيدي ؟؟ المعلّق الرياضي الاوّل في تونس ، توفيق الوحيد ، الفريد من نوعو (آخر كعبة في الفترينة) ، معلّم المعلّقين ، المجدّد دائما و ابدا في دومانو ، هاوي الاسفار و اكتشاف البلدان و حضارات الشعوب ، صاحب الضمير الصحفي ، المعلق التونسي الوحيد اللي ما ينجّمش يفلّت التظاهرات الرياضية ، العاب اولمبية ، العاب متوسّطية، بطولات عالمية ّ، دورات اقليمية ، بطولات قارية ، راليات ، دورات تنس، كرة يد ، كرة سلة ، كرة قدم، سباحة ّ، عدو ريفي ، سباق خيل ، كانوي كاياك ، ملاكمة ، مصارعة ، تايكواندو ، جي جي تسو برازيلي ، تسلق جبال ، قفز باللاستيك ، صيد اسماك، صيد فراشات ....
و فمة أخبار حول استدعائه من طرف كبرى الشبكات التلفزيونية في بلاد العم سام لتغطية السوبر باول نظرا لخبرته كذلك في كرة القدم الامريكية ... الا انو رفض الدعوة بكل لطف ...لأسباب مجهولة.

سي توفيق العبيدي يعتبر من المشاكل المزمنة اللي أثّرت سلبا على الصحافة الرياضية و قطاع الرياضة بشكل عام ، و بفضل الطلعة البهيّة متاعو ، الاكيد انو نفّر العديدين من متابعة المقابلات و التظاهرات الرياضية اللي يقوم بتغطيتها ، و ساهم بطريقة غير مباشرة في خدمة منافسي قناتنا الوطنية ، و مكّنها من مشاهدين اضافيين و حرم بالتالي قناة تونس سبعة من مداخيل اشهارية اضافية .

لهنا نوصلو لنقطة اخرى هامة و اللي ربما تساعدنا باش نجاوبو على السؤال حول الاسباب اللي تخلي مسؤولي التلفزة يحافظو على توفيق العبيدي ضمن فريق المعلقين و عدم اجباره على الاكتفاء بمسؤولياته كرئيس قسم الرياضة و اعطاء الفرصة للمعلقين الشباب.
خاصة و انو اللعبة فيها نسب مشاهدة ، و مداخيل اشهارية.
الاجابة الوحيدة للسؤال هذاية هو انو مسؤولي تونس سبعة عندهم لوجيك اخرى يخممو بيها و هي ابعد ما يكون على منطق المنافسة بين المؤسسات الاعلامية في العالم،
قناتنا المحترمة و المحظوظة ماعندهاش مشكلة متاع اشهار و مداخيل اشهار ... مادام عندها الإتاوة اللي تقبض فيها مع كل فاتورة من فاتورات ستاغ تخرج في البلاد، كل دينار يدخل للشبابيك متاع الستاغ قناة تونس سبعة تاخذ منو نسبة، و نخليلكم الحساب باعتبار عدد المشتركين و نسب الاستهلاك المنزلي اللي التلفزة ماتمثّل كان جزء ضئيل منو مقارنة ببقية التجهيزات المنزلية ...
و لذلك ما يهمهمش شكون يعلق و شكون يقدم البرامج ، ما يلوّجوش برشة شكون وجهو يصلح للتلفزة و شكون اللي عندو اطلالة تقطع الرزق و العياذ بالله ، ما يهمهمش اذا كان السيّد المعلق ماعندوش ادنى معرفة بالرياضة اللي يعلّق عليها ، الكلها خدمة "كعور و ....."و"ديما يمشي ..." و "عندكش عندي..." و "دز تخطف" و "خلي هكاكة اللي عجبو عجبو و اللي ماعجبوش يطيّر قرنو

و في الختام نتمنّى انو قراء المدوّنة يضمّوا اصواتهم لاصوات مجموعة الفايسبوك و ينضمّوا لحملة مناشدة سي توفيق باش يعلّق (الصّباط) .
و نخليكم مع تشكيلة متميّزة من روائع سي توفيق العبيدي اثناء تعليقه على مقابلات كرة القدم ، على امل انّو حتى المترددين و المتشككين يقطعوا الشكّ باليقين و يقتنعو بضرورة تخليص قطاع التعليق الرياضي من صاحب الـ "دائما و أبدا"


"قالك أسامة الملولي من مواليد1954



قالك أسامة الملولي وضعتو أمّو في بحر المرسى


أسامة موجود على الكولوار رقم 6 و هو على الكولوار رقم 5

"الي يكون في المركز الأول أثناء السباق يكون عليه ضغط كبير و ساعات صاحب المركز الثاني يفرش عليه السباق


عوض باش يقول :" يتبع خطى أو يحذو حذو الملولي" هاو آش قال :"على الشباب التونسي أنو يقتفي أثر الملولي


وسام يحيى قطع ألاف الكلمترات


بن خلف الله قاعد يقوم بادوار غريبة


منافسي اسامة ملولي لا ينامون الليل وهم يرتعدون


هيرتا برلين متصدر الطليعة في طليعة المتصدّرين


احمد الحامي و طويلة لكن ارضية و قصيرة


العلاقي يختلي بالحارس


لميدالية الذهبية الي تحصل عليها السباح الصيني أثارت الكثير من الحبر


وفي الأخير ما يصح كان الصحيح.... والآن نستمع بكل خشوع وإجلال إلى النشيد الرسمي.


الملولي المرة هذي خذا الميدالية الذهبية و ما كل مرة تسلم الجرة



الترجي الرياضي الساحلى


نظرا للإقبال الجمهوري الكبير و الكبير جدا


الحارس يخرج الكرة بطراطش الصوابع


تمشي الكورة لحكيم (كريم حقي)


سالومان(سلومون كالو)


سيف غزال يلحس الكورة لحسان


الحارس رشيق ومرن


هجوم سريع لكنه بطيء


حسين الراقد جميل وجميل جدا

إذا على هذا التحليل المقتضب نعود إلى ستوديوهاتنا الرئيسية


يلزم حبك الهجومات بطريقة سريعة وسريعة جدا


حكيم قالو حسين الراقد ديما تمريرات ساهلة و دقيقة
-توفيق لعبيدي: هذا مانعبرو عنو بالسهل الممتنع


شوقي بن سعدة


رقم 13 يخرجو الحكم


حضور جماهيري غفير ما فماش ابلاصة شاغرة


القربي الى الراقد الى بن خلف الله و مساحة رأوية شاسعة جدا


تمر الكورة فوق الحارس ذو القامة المديدة


باهية الميكارى يخلط و الا ما يخلطش يخلط و الا ما يخلطش....


الرياضة التونسية تعيش في الربيع متاعها رغم الي احنا في فصل الصيف


و فما تناغم كبير بين الدفاع التونسي


نشوفو محم... نشوفو الهجوم هذايا ...


وسام باش يدخل منذ قليل


من دون اي مقدمات نمرو لأحمد الصالحي ....


زاكوورا(زوكورا)


لنستمع لدقيقة الصمت


إنقضاض إنزلاقي


الإقبال الجمهوري


كرة على القائم الأيمن.. لا الأيسر..لا الأوسط.. و البرة


آلهة الملعب غاضبة على عصام جمعة


مع الاسف تمر جانبية آآه لحسن الحظ والحمد لله مرت جانبية


الصعب الممتنع

المصدر


16 commentaires:

never done a dit…

العلاقي يختلي بالحارس

chanfara a dit…

إنقضاض إنزلاقي

هههههههههههههههههه

arabasta a dit…

looooooooooooooooooooooooooool


Enooooooooooooooorme!!!!

Clandestino a dit…

انا عجبتني ما كل مرّة تسلم الجرة متاع ميدالية الملولي
ملا فال احرف :)))))

Hamadi a dit…

C'est une catastrophe. Il doit prendre sa retraire.

Clandestino a dit…

@hamadi:
لا المطلوب موش التقاعد متاعو..
احنا نحبوه يعتقنا من الميكروفون و يبعّد خلقتو قدر الامكان على الكاميرا
فقط.
قد يكون رئيس قسم رياضة ناجح و متميّز و كفؤ
شكون يعرف ؟؟

Hada Ana! a dit…

"سيف غزال يلحس الكورة لحسان"

متفكرك بشي؟
على كل حال... طول و خزز... جاء الوقت باش نشوف وجوه جديدة توزن الحديت متاعها ...

lutfi a dit…

tout ceux qui se rappellent d'un certain match Maroc - Tunisie en 1988 savent bien comment si toutou a été nommé chef de service.
d'ailleurs il ne rate jamais l'occasion de mentionner l'apport divin de Barak Obama dans le sport tunisien wafdhalou 3lih.

bref il est grand temps que Tunis7 respecte ses pourvoyeurs de fonds qui sont nous, malgré nous.

wkayet zeda pour Ganzou3i sport pour qu'il se barre, car 13 ou 14 ans avec la même fouguira tout les dimanche c'est....

lutfi a dit…
Ce commentaire a été supprimé par l'auteur.
lutfi a dit…

et puis dans la liste de ses inombrables prouesses j'ajouterais celle ci :

الترجي الرياضي في المرتبة الأولى ب19 نقبة آه عفوا 19 نقطة

lutfi a dit…
Ce commentaire a été supprimé par l'auteur.
lutfi a dit…
Ce commentaire a été supprimé par l'auteur.
ghassan ettounsi a dit…

الحل الوحيد هو أنو رئيس غانا ولّا مرتو يتفرجوا فيه ويشوفوا المهازل. ربما كان وحدهم مايعملوا شيئ لكن كان يتفرجوا فيه مثلا مع حاكم دبي توا يحسوا شويا ويخلطوه على مدير تونس 7 وعلى رؤوف كوكة.

Anonyme a dit…

salut clando, a3mel tala 3ala les liens vers tes messages blogs, je pense que prastos y met des liens vers ses vomissements (comme par exemple sur cette note: http://el-clandestin.blogspot.com/2009/05/blog-post_29.html) chehia tayba :-)

Anonyme a dit…

شحكى "سي توفيق" في ماتش تونس ولمغرب ؟
علاش طيروا مدير لذاعة ؟
نورنا يهديك

foued a dit…

ana 3ejbetni :
هيرتا برلين متصدر الطليعة في طليعة المتصدّرين
looooooooooooooooooooooooool