اللي حرق صحّا ليه...و اللي م نجّمش يحرق مرحبا بيه. نحن لم ننتظر اربعطاش جانفي

lundi 14 avril 2008

الزبراط و الخوانجي و كسكسي السلف الصّالح


بقية الجزء الاول:
قلت انو العرب احسّو بوقع صدمة قاسية , مثّلت قطيعة (ابستيمولوجية) و نقلة (معرفية) مطلقة , من مفهوم الحرقة الجغرافية الى مفهوم الحرقة المرتبطة بالعامل البشري الانساني , فاللي يحرقو عادة في بالهم ماشين لبلاد ما خير (اي خير من بلدانهم الاصلية) لكنهم في الواقع مخلّين الشمس و البحر و الطقس الجميل المعتدل و ماشين لبلدان الثلوج و الضباب و الغيوم على مدار السنة. و هاذي حاجة ماكان يفيق بيها حد لأنو طبيعة الحياة و الفرص اللتي تتيحها في اوروبا و امريكا تغطّي على سوء الظروف المناخية و العوامل الطبيعية, و في نفس الوقت ما ينجّم حد يستمتع بالحياة في بلدانهم لانو فمة عباد - ربي يهديهم - مسخّرين حياتهم لحرمان البقية و سد كل الابواب و المسالك امامهم و تدوير خواطرهم بشكل متواصل , ما خلاولهم شيء الا خيار الحرقة... فيحرق البعض (ساعات مرغم) و لسان حاله يقول ليس بالطقس وحده يحيى الانسان .

نرجع للقصة,
في الاثناء, و اثناء تفتيش الارث اللي خلاوه النازحين للمريخ , تمكّن بعض العرب من العثور على اوائل السفن الفضائية القادرة على السفر بين الكواكب...

و في المركبة التونسية المسمّاة -ت-ل-7-, ("ت" اي تونس و الـ "ل" ترمز للامبادوزا الجزيرة الايطالية المعروفة في القرن العشرين بقبلة الحرّاقة, اما الـ "7" فهي رمز كبير و عريق للتوانسة, و ما فماش شكون يعرف اصله الدقيق, البعض يظن انو يعود للحضارة الفينيقية , و البعض الآخر يظن انو جاء مع الاسبان , او خلاه لويس التاسع خلال حملته الصليبية على البلاد في القرون الوسطى...و فمّة حتى شكون يمشي في اتجاه الاصل الديني المقدّس و يحيلنا على ليلة القدر اي ان هذا الرمز نزل ليلة القدر و قد اتى ذكره في القرآن و العهدة على اهل الذكر من المشايخ و العلماء).

في هذه المركبة قررت مجموعة من الشباب الحرقة الى المرّيخ لحاقا بركب الحضارة. فحضّرو لوازم الرحلة من مازوط ليبيا(1) و شكاير الخبز و الكسكسي و المقرونة و حكاك الطماطم و الهريسة و التن و السردينة, و ستوك ضخم متاع معسّل و جيراك و شيش من الجيل الثالث(2)... و قصدو ربّي.

تعدّت الاشهر الاولى متاع الرحلة لاباس, الشاب حسني يغنّي, التاي يطيب في البرّاد, الشيشة تقرقر, و الجماعة ليه ليه يلعبو في الكارطة, ما حسّوش بالوقت تعدّى.
بعد 15320 طرح شكبّة (بو 21) و 21500 طرح رامي و 3 ملاين مانش بولوط, تهرّات الكارطة بين ايديهم و بدات تظهر عليهم علامات القلق و الفدّة.

قام واحد منهم سكّت الكاسات ... و عيّطلهم الكل قدّامو
"ايّا تصلّيوش على النّبي يا جماعة"

(الجميع بمن فيهم الزبراطة و السوكرجية) : "صلّى الله عليه و سلّم"

"سألناش ارواحنا , فين ماشين؟ علاش حارقين؟؟ فماش شكون خمم , شنوة يستنى فينا لغادي؟؟ ياخي سكّان المرّيخ زعمة يفرحو بينا ؟؟ بالكشي يبعثولنا صاروخ مازلنا في السماء؟؟ وحيّد لا يقرأ لا يكتب يمشينا طروف, و الا بالكشي يهزولنا طول للحبس و يعاودو يبعثونا اكسبيرسي؟؟ شكون قال اللي باش نسلّوكها لغادي ؟؟"

(الجميع , بعد لحظات من الصمت):
"ايه و الله بالحق"
"لا ماهو يهزّونا للحبس و مبعد يعطونا مهلة باش نروّحو و احنا و قتها ندبّرو روسنا"
"صحيح, فمة شكون حكالي على ناس بكري كانو يستغلو المهلة هذيكة باش يدبّرو مرا يعرّسو بيها و الا يخدمو في النوار حتاش تحلّ ايطاليا الاوراق"

الأول: " ايه باهي , لو فرضنا اننا دخلنا لغادي و قعدنا, زعمة نجّمو نخدمو و نقدّو ارواحنا؟؟ هاذي بلاد كيما في "ستارتراك" و فيلم حرب النجوم, كل شي اوتوماتيك , و الكمبيوتر هو الكل, و احنا عباد متاع بالة و مسحاة و بيوش, كيفاش باش نخدمو و اش باش نخدمو؟"

فسكت الجميع, و بداو يخزرو لبعضهم , فيهم شكون تفكّر روحو , و ندم على سنوات الهملة و الضياع , و تمنى لوكان قرا على روحو... و فيهم شكون تفكّر امّو , حسّ بالحنين للمرمز و الجلبانة متاع امّو, و حسّ بالدمعة تسخن في عينيه...

قام واحد كان شادد التركينة, طوال الرحلة وهو ساكت , عمرو ما حل فمّو و لا شرب و لا غنّى معاهم و لا حطّ الكارطة في ايديه , و ظاهر اللي عمرو ما استعمل الجوتابل:
" بسم الله الرحمان الرحيم, ايّها الاخوان , اخنا وقت اللي قررنا السفر , توكّلنا على ربّي , باش نهجّو من الظلم و الاستبداد , و نهاجرو من بلاد الفتن و الكفر و الطغيان, و عندما يكثر البغي و الظلم في البلاد و تقوى شوكة اعداء الله, علينا بالهجرة كيما عملو الصحابة الميامين و سيد الاوّلين و الاخرين عليه افضل الصلاة و اتم التسليم"

الجميع:
" عاد انتي تحكي على الكفر و انتي ماشي لبلاد الكفار"
" ايه بالحق انتي ماشي لبلاد الشراب و البيرة و لحم الحلوف و الزنا و الفواحش و الموبقات السبعة"

صاحب اللحية: " فعلا , وهذاكة علاش فرض علينا الجهاد, يلزم نفتحوها البلاد هاذي و ندخلولها الاسلام بالقوة كان لزم, فالجهاد فريضة , و مادام فمّة بلاد لم يطرقها الاسلام وجب علينا كمسلمين فتحها كما فتحت فارس و خراسان و بلاد الروم و افريقية و الاندلس"

واحد زبراط ( يعرف السيّد الملتحي منذ سنوات و كانو اصدقاء في الحومة و جمعتهم قعدات و اجواو كبيرة):
" ههه اسمع منو الوحيّد , بالله قلّي يا اندلس, احنا توّة ماهو طايرين في المجموعة الشمسية ؟؟"
صاحب اللحية : "ايه"
الزبراط:" قلي كي تجي باش تصلّي , كيفاش تعرف القبلة منين؟؟؟"
صاحب اللحية: " اعوذ بالله و استغفر الله, ماهذا الجهل , الله موجود في كل مكان و اذا غابت عليك القبلة فقبّل حيث شئت, و اينما تولو وجوهكم فثمة وجه الله"
الزبراط: "باهي يا جماعة اسمعو هاذي, هاو باش نسألو, ايا سيدي انتي ماهو تقول بروحك في الدين و الفقه , شنوة اللي تم انزاله ليلة القدر شنوة اللي اتى ذكره في سورة القدر ؟؟؟تتطلعشي الـ7 اللي تحكي عليها الناس لكل ؟؟"
صاحب اللحية :" لا ايها الجاهل , موش السبعة , هذاكة السائد و اللي تتداول فيه العامة, المقصود هو الكسكسي , الكسكسي باللحم , كيف نرجعو للتاريخ نلقاو انو ناس بكري كانو يطيّبو الكسكسي في الليلة الـ27 من رمضان و يتصدقو بيه , و احنا من واجبنا الاقتداء بالسلف الصالح , وهي سنة حميدة يلزم نحافظو عليها"
الزبراط: " هههه يزّيك يا راجل من التدجيل على العباد , و انتي على ما يبدو ما تفهم كان في الحروبات و الفتوحات و التكفير و التحريم, ساهلة هي الامور هاذي ؟؟

يعاود الأوّل يسأل الجماعة : " ايا شنوة قررتو توة؟؟ نكمّلو و الا نروّحو , الحكاية راهو حامضة شوية و ممكن ياسر تطلع قرعة, و انا من راأيي نروّحو, و ندبّرو روسنا في بلادنا و مولاها ربّي"

الجميع:
"دبّر على روحك"
"برّة **** يعطيك *****"
"رابحين خاسرين ماناش مروّحين "
"ماحاسب نقطع رقبتي تحبني نرجع "
"لعن الله المنافقين ممن يعطّلون الفتح و الجهاد"
تحبّ تروّح ؟؟؟ ايا برّة روّح""

و دارو عليه و شدوه ربطوه و طيشوه البرّة مع الفضلات ...


بعد عشرين سنة من الاحداث السابقة:
نشرة الاخبار في فرانسا متاع المرّيخ:" .... تم اعتقال عدد من اعضاء حزب "المرّيخ للمريخيين ", المتهمين بتعذيب و قتل المهجرين العرب, و خروج نصف مليون مهاجر في مظاهرات حاشدة في شوارع باريس (الجديدة)"
---------------------
(1) مازوط ليبيا المقصود بيه هنا هو الوقود النووي المطوّر اساسا للسفر عبر الفضاء في الجماهرية العظمى , الا انّ التسمية المذكورة بقيت تعتمد لتسمية كل انواع الوقود منذ ظهور و ازدهار حضارة بن قردان العريقة.

(2) اي الشيشة اللي تشعل وحدها من غير ولعة و من غير فحم

20 commentaires:

Anonyme a dit…

مرة أخرى: يعطيك الصحة
سخفني الأخ
LOL

Anonyme a dit…

نسيت
ربي سامحك يا فرفر
حاسس اللي انت عندك ضلع في تغيير الأحداث

FarFar a dit…

بون كلندو
مشيت بلقدا ملول و من بعد بلبزتها..ديور في الأخير.. هرب علي شنو تقصد في الحكاية لكل....
وانا من طبعي منحبش التفدليك في امور الرموز الدينية...و الجهاد..و بو لحية... و الخ

و الا انت من جماعة حرية الرأي..ممكن..

Gouverneur de Normalland a dit…

berjoulia ... 9rit fi 7yetti barcha des blogues et des postes ...
tes postes sont vraiment exeptionels . Bravo.

tu as vraiment beacoup de talent

FarFar a dit…

فسيفساء
تقصد التعليق لول متاع الجزء الأول
هههه

أبروبو علي فازة الرقم سبعة و الأصل متاعو.. تفكرت حكاية.. بصراحة متفكرتهاش برشة..ذكريات بعيدة في مخي..
نتفكر مرة نتفرج في برنامج في تونس سبعة ممكن.. ممكن حومة و حكايات..
حسيلو يحكيو قالك الي..'ممكن'.. و الا هكة يقولو.. الي سي بوسعيد الباجي.. ممكن يكون.. واحد قديس ..درا شنو اسمو الأصلي.. جاء..و سكن في الشيرة هذيكة.. و من بعد اسلم ولي اسمو سيدي بوسعيد.. و قالك باش يدعمو الفكرة هاذي.. وراو باب في سيدي بوسعيد.. الباب لمسكر..بعد بياع لبنبلوني..تحت الزاوية.. في الزخارف الي في الباب ..موجود الترافل.. الي جاية من الصليب.. نورمالمون.. .. ..
كيما قلت.. ما نتفكرهاش الحصة مليح.. أما بصفة عامة.. هاذي هي الفكرة..

3amrouch a dit…

فرفر
انا بيدي من راي زياد في انك السبب في تغيير وجهة الحكاية

FarFar a dit…

المتهم: فرفر
التهمة: تغيير وجهة
الضحية...؟؟؟

FarFar a dit…

كلندو
عندي ليك سؤال بسيط..
توة كي تقول الزبراطة و السوكارجية حاشة لمحل...شنو الفرق مبين لثنين..
..
زعمة السوكارجية هوما الي يسكرو..و الزبراطة هوما الي يدورو عالكمية.؟.

Clandestino a dit…

انا كي نكمل البوست اكثر
حاجة نخاف منها هي الاسئلة المحرجة متاع الفرفر
اما ميسالش
اوة نجاوبك
السوكارجي هو اللي يشرب الشراب المتعارف عليه و الزبراط عادة هو اللي يشرب حصريا الكوول و القوارص و ما شابه

FarFar a dit…

شكرا كلندو علي الاجابة
:)

Anonyme a dit…

المتهم: فرفر
التهمة: تغيير وجهة
الضحية...؟؟؟

الضحية: البوست في حد ذاتو
وأحنا، نسبيا

فرفر، تهانينا لكرة اليد. لولاد عملو مقابلة حلوة
نعرف اللي متحبش الكورة. لكن غدوة الاربعاء، أمي تطيب كسكسي متاع العادة والعوايد. وغدوة كان الستاد تمرق في ليتوال، نكونوا قطعنا شوط في رميانهم للمريخ
mdr
هكاكة هاوكة قعدنا في نطاق التوجه الفلسفي متاع خوما كلاندو

Anonyme a dit…

معذرة اللي آنا نسيت اللي اليوم هو الاثنين.
c ce qu'on appel une projection future dans le temps.
c filozofike aussi

FarFar a dit…

فسيفساء
أنا نورمالمون و ربحنا باجةو الا مربحناهاش نهار لربعاء و كان عشنا و ريقلت أموري باش ندبر تسكرة.. باش نشد الرحال لسوسة في رحلة العودة بالبطولة انشاء الله
..
و كيما قالي كمراد ( موش مراد بضم الميم.. كمراد معناها زميل في الكفاح بالسوري )نمشيو نجيبو البطولة ونعملو احتفالات للفجر ههه

titof a dit…

ريت روحك ماو كلندو اهوك فمة حرقة ومعيطليش باهي ....ميسالش ...
اسمع حكاية عالمية برجولية ويعطيك الصحة
والبولحية الي عندك هو بيدو البولحية الي عندي انا في بوست متع عركة في عيد الحب ماهموا كان في الحروب



المتهم فرفر
التهمة تحويل وجهة حمار دون السن القانوني هههههههههه
تمشيش تتغشش فرفورتي نلعب معاك راو
هههههههههههههههه

ويعطيك الصحة ياكلندو سبعة وسبوع عليك


هوامش.................
السكارجي والزبراط
جاء في لسان العرب والمنجد المحمول ان الزبراط هي صفة من صفات الجاهلية وكان يكنى بها الفصايل في ذاك الوقت
فيقال فلان زبراط
والسكارجي هو الفيناس والقننو ولعل حرب الزبراطة والسكارجية في القرن الحديث اكبر دليل على اختلاف هذين المذهبين حيث روي ان ابو الطيب السكارجي خرج على الناس في مبيتت المعتصم بالله السبعاوي وقال هجائيتة الشهورة في الزبراطة
ان اتتك مذمتي من زبراط
فهي الدليل اني راجل وهو عفاط
ولم سمع كبير الزبراطة عمار 404 خرج على مليشيته وقال خطابه الشهير
نحن الزبراطة قادمون...وعلى رؤوس المدونين لعفسون.....وانكم ايها السكارجيةلمستهدفون...من رجالنا وسوف تعلمون ...من هم العفاطون ..واننا لمدوناتكم لحاجبون...ولامهاتكم لناكحون...ايها التافهون...بل انتم محنون بالوسكي والبيرة لو كنتم تعلمون...ونحن المزبرطون....على كل فعل قادرون قبيحا كان اوجميلا ان له لفعلون............
هاو التعريف خويا فرفر

mandela a dit…

@الكلندستان
نعرف شنية ناقص يا كلندو هنا واحد شويوعي متاع الرب ماركسي لينيني قام لاكا شبه شبه خوانجي سخسخوا كي مريول الخلعة ومبعد قال للجماعة البروليتاريا الرثة متاع المريخ تستنى فينا باش نحرروهم من الامبريالية المريخية المتوحشة ونعلنوا عن اقامة اول ديكتاتورية بروليتاريا مريخية

Werewolf a dit…

يعطيك الصحة كلاندو رغم اللي عندي الثقة اللي ثمة جزء ثالث...لي تريولوجي ولاّوا موضة في الأعمال الفنية...المقال تم تغيير وجهتو في التعليقات مالحرقة الفضائية للكورة
@الكلوبيستية:
ان شاء الله مربوحة

هناء a dit…

كالعادة مميز

Anonyme a dit…

إلى الاخ إلكلاندستان,
إما بعد,فنظرا للتحامل الشديد الذي طرأ في تدوينتكم على معشر الزبراطة فاني و بصفتي ا لناطق الرسمي باسم الإتحاد العام للزبراطة ابلغكم ما يلي :
ـ استنكارنا الشديد للثلب و التجريح الذي ورد رالتدوينة و هو اسلوب فاشل تستعمله السلطة الكلاندستنية لزرع البلبلة في نفس الزبراطة.
ـافتخارنا بصفتنا الزبراطوية و استعدادنا للذود عنها بكل السبل امام كل ما يهدد ركائز هويتنا.
ـتنديدنا امام الحملة التي تشنونها ضدنا استجابة لاجندات اجنبية
هههههههههههههه

mandela a dit…

@zabratfromgeneva

أنا مساندك وأندد وأشجب و أستنكر واعبر بإسم الحرباشة وأوفياء السوبيتاكس و التيمستا واللي تم تهميشهم وإقصاءهم من قبل الكلندستان عن نيتنا جمع إمضاءات المدمنين أجمعين في عريضة وطنية نطالب فيها بحقنا في تزبريطة وتحربيشة سليمة وصحية وفقا للمعاير الكلندستانية ونعبر عن رفضنا ترشيح الكلندستان لرئاسيات جمهورية الكلندستان عام 2009

Anonyme a dit…

5ouya tbarkallah 3la 5ayel el wesa3 mte3ik..
c toujours un plaisir de te lire.. :)

Powered By Blogger